Festival Kreol, Sesel: Discours en kreol du ministre de la Culture

There are no translations available.

La 24e edition du Festival Kreol Sesel est ouverte! Discours du ministre du Developpement communautaire, la jeunesse et des sports et de la culture en kreol seychellois.

DISKOUR LOUVERTIR OFISYEL FESTIVAL KREOL 2009 – PAR MINIS POU DEVLOPMAN KOMINOTER, LAZENES, SPOR EK KILTIR – LE 23 OKTOB, 2009.

Lasezon Kreol in refleri. Ankor enn fwa nou pe selebre nou kiltir. Prezidan Larepiblik… envite distenge bonswar. Nou kiltir I reprezant tou laspe nou lavi - spirityel, materyel e entelektyel - ki disteng nou konman en pep.

Pandan sa dernyen 24tran Sesel in reisi etabli en repitasyon konman sa pei avangard dan devlopman lalang kreol, kiltir kreol e lidantite Kreol atraver lemonn.
Noun fer li e ozordi nou fyer ki nou kapital, Victoria I kapital lemonn Kreol.

Se nou diversite etnik ki ganny manifeste atraver nou fason viv, nou lakwizin, nou ladans e nou lar - bann atou kin ed nou pou kapab fer sa. Sa bann atou i pa zis bann mwayen divertisman me bann ki anmenn linite, stabilite ek larmoni parey i ganny reflekte dan kouler nou paviyon ble, zonn, rouz, blan, ver.
Koste ansanm, ede pou fer li monte…

Dan son diskour kot UNESCO pli boner sa mwan Prezidan James Michel ti dir ‘nou fermman kwar ki devlopman dirab i bezwen ne e ganny nouri par lidantite kiltirel.
Nou zefor se pa zis pou protez e transmet en pase kiltirel avek avek zenerasyon fitir, me pour ankouraz zot pou fasonn nou kreolite atraver bann lar, spektak vivan, literatir, lanmod, gastronomi ek lartizana.’ Fen-d-sitasyon.

Proteksyon, prezervasyon e promosyon nou leritaz kiltirel alor, i devret pran plas a tou nivo.
Se pour sa rezon ki nou selebre nou bann gran artis par egzanp Patrick Victor, Leon Radegonde ek Alcide Libanotis kin anmenn nou kiltir lo nivo enternasyonal.

Listwar nou kiltir pa pou konplet si nou pa rekonnet bann gran zonm ek fanm tel ki Antoine Abel, Tonpa e Danielle Jorre de St. Jorre.
Me nou kiltir i pa zis dan lapentir, lanmizik ek literatir, nou kiltir i sa ki nou viv toulezour.

Nou osi selebre madanm Albertine ki ankor pe griy son pwason dan boukan, tann Yaya ki ankor pe prepar son kafe dan lagreg ek msye Dogley ki ankor pe fabrik larap koko ek larozwar pou plizyer nou dan lakour.

Zot osi zot pe ede propaz nou kiltir.

Sesel….Ozordi nou pe viv dan en sosyete modern, en sosyete ki pe kontinyelman evolye. I neseser ki nou osi nou evolye avek letan tout an gardan bann bon valer dan nou tradisyon, an liny avek nou slogan ‘en lizye lo lepase, en lizye lo lavenir’.

Nou kiltir i presye, i nou lidantite, i parey lanprent nou ledwa…Se nou kiltir ki fer nou diferan avek sa lot et imen, ki parey ek nou fizikman, me kin grandi dan en lot pei.
Se bann valer nou kiltir ki fer nou vin Seselwa, e sa bann valer nou ganny dan lakour.
Annou dan nou lakour, dan nou fanmiy, dan nou kominote prezerv sa savwar viv e savwar fer ki noun erite avek nou granmoun. Annou kontinyen valoriz lapolites, lakoutwazi ek latolerans. Fodre nou solid pou pa les lapares, konportman devergonde e labi sibstans detri nou kiltir e nou tradisyon.

Atraver dyalog noun osi pran konsyans ki i annan en lendistri kreatif ki son potansyel pankor ganny eksplwate o maksimonm. Nou bezwen seryezman etidye potansyel propriyete entelektyel e lendistri kreativ. Lendistri kreatif i lansanm bagaz konesans, e kapital entelektyel e vokasyonnel ki nou pep i posede pou transform materyo ki trouve dan lanatir otour nou dan bann prodwi de ot kalite.

I annan en kantite artis, entelektyel e antreprener ki annan kreativite, inovasyon e kapital, ki kapab fer bokou kontribisyon pou anbelir, dan nou ka, Festival Kreol. Se zot ki kapab fer li sa vitrin kot en pli gran varyete nou bann larises kiltirel i ganny ekspoze e valorize.
Fodre touzour gard antet se nou kiltir, nou lidantite e nou kreolite, melanze avek labote nou lanvironnman ki fer en touris deside swazir Sesel pour son vakans.

Mon apresye ki nou pe ganny plis sipor avek tou kous lasosyete dan preparasyon Festival Kreol. A sa pwen nou tya kontan remersye bann lorganizasyon, bann volonter, artis e teknisyen kin ed nou pou organiz sa enn Festival.

Dan en lannen kot nou pe fer fas avek reform ekonomik, mon rekonesan anver bann lakonpanyen kin epol nou e donn nou sipor finansyer pou tenir sa manifestasyon nou lidantite vivan.

Mon tya kontan ozordi…lans lapel ankor enn fwa pou partisipasyon pli nonbre par sekter prive, sirtou bann ki zot biznes i depan lo prezervasyon la kreolite e lidantite nou kiltir.
Se avek zot sipor ki nou pou kapab asire ki lobzektif prezervasyon, promosyon e devlopman nou leritaz kiltirel i kontinyen epanouir.

Nou bezwen gard sa fason viv e bann valer ki karakteriz Seselwa vivan, pour ki nenport landrwa kot i ete a traver lemonn i a touzour fyer i en seselwa e ki i touzour annan Sesel a ker.. e ki Sesel i a touzour son pei seri.
Se avek lafyerte e lemosyon profon ki mon deklar 24 ienm edisyon Festival Kreol ouver.

ANMIZ ZOT BYEN.